ابقى راكز يا ولد
ما تدي ضهرك للبخون
خلي الهتاف عالي وشديد
ضد البيبيع خير الوطن..
ودم الشهيد ما زال جديد
خليك راكز وما بتخاف
سجّل حضورك في التمام
وارفع شعارات الوطن…
الليها كم ضحّى الشهيد
سلمية كانت ثورتو…
حرية لي فجر الخلاص
مدنية اصلا منيتو…
والعدل دايماً هو الأساس
ترّس شوارعك يا ولد
وحّد صفوفك وكلمتك
نادي المعاك…
وصّل رسالتك ومطلبك
انو البخون شعب الوطن
لابد يكون قابض الثمن
من ارزقية بلا فهم…
عارفيننا الشعب العنيد
وارادتو فوق كل الشعوب
لمن تهين لي عزتو …
يا شعب ابدأ ما بلين..
وسلاحو دايما كلمتو …
الليلة طالعين بالهتاف …
سلمية في كل الظروف
سلمية وحدت الصفوف …
مافينا خوّاف او جبان …
حاشانا ما بغشانا خوف …
شعبا يصارع للجبال …
شعباً يمين عالي الكفوف …
شعبا سلاحو نشيد جميل …
و الطلقة زغرودة نضال
دة شعارنا لو انت بتشوف …
في كعبة الوطن الكبير …
كل الخلوق تمرق تطوف …
تسعي وتهلل وتبتهج …
ما الصبح لازم ينبلج …
والصبح جلاّب للطيوف …
ثورتنا ممهورة بدماء …
ثورتنا ما ثورة ( ظروف ) …
دقّوا الدفوف …
كنداكة يا بت الوطن
ابدي الهتاف..
نشيد علم
سودانا فوق …
سودانا فوق …
