أحبك موت
محمد حسن الشيخ
منو القال ليك تعال ساعدنا لو تقدر
منو الأدَّاك دفاترنا عشان تكتب ملاحظتك عن الأحزان
هنا القانون بيفرض انو تاني الزول يراجع قلبو كم مرة
وكم مرة قَبُل ما يقول
هنا القانون بيفرض انو تاني المطرة لما تصب تدق الباب
لزوم تتضاير الشجرة
وتستر عورة المحصول
هنا القانون بقول عن حفرة الدخّان تكون بين شتلة الحِنَّة وصريف الحوش
وفي عمق الأسى وأعمق
وعن أثر الطلح حصة
وعن تبروقة الضيف النسى الإبريق ملان في السوق
لا فاوَض
ولا حاصص
ولا اتكلم عن الثروة
ولا عن طبقة الأوزون .. .. ..
فهل دفع المدير تعويض أراضي القوز
ملا الدولاب
وجَنَّب من خزينة المال تمن فيلا وعروس رابعة .. .. ..
وهل استبسلن نيمات يوم ما هاجر القمري
وأدى الطين ملاية وملفحة وجزلان
ومفتاح أوضة الديوان..
هنا أمدرمان
ضلام يونيو
يأسس من رصاص الموت صدى الصرخة
نشيد من ساحة الذكرى
منو الفَتَّح شبابيكو
وقفل أبواب قيادتو العامة للآخر
وإتأخر يأذن في الحشود يا قوم
أبوي الشيخ مرق من خلوته وروَّح
صعاليق الجبال رقصوا
بنات الناس دهب كنداكة كوشية
نعم كنداكة دغرية
لا سرَّاقة
لا محتالة
لا نصبت شراك الدين
لا ارتادت سجن راجيك تشرِّفو يوم
منو الأهداك براح خاطرو وصرَّح ليك تغني براك
بدون محضر
ولا شاهد يقول للقاضي قوم ارتاح
سمح لعب الكبار وكبار
قميص حَكَم الوسط أصفر
فهل تقدر تسمِّي النايب العايب وكيل أعمال
خلاص وصلت رسالة الشوق بريدي الخاص
هنا الثورة
وشارع النيل، غسيل عربات، شراب الشاي وونسة دقاق..
وما راجعين
هنا الثورة
وكم سعر الجنيه في الصيف
وكم سعر الضمير الحي
وكيف تقدر تساعد حاجَّة تعبانة وفاقدة العيش
رغيف ناشف
فرن واقف
وحال نازف
وماهو الأحمر النشوان
كلام نسوان
وماليات الكراسي لحم وباغات زيت
أحبك يا صديقي المات
منو الخلَّاكَ تبقى شهيد
رسم جسدك على الضفة
على الحتة القبيل كانت ملاذ آمن
مسيد حيران
مسيح في حيِّز الميدان
كضب واضح
بدون إثبات
بدون برهان
أحبك يا صديقي المات
أحبك موت
أحِي…..
وأحيي معاك رئيس الوزراء
والجايين من الغابة
ومَن سكن الفنادق فوق
وإحتلَّ الحديقة ضحى
وإستلَّ السلام كالسيف..
أحييك كيف؟
فيا سيد السلاح أجمع سلاحك صَر
ويا القايد الزعيم شوف لجنودك بَر
أو بالتالي اتقهقر
دي ما كرري
ولا توشكي
ولا شيكان
ولا شيكات موَقَّعة من رصيد الدم
مهنضبة في رصيف الهم
منو الأدَّاك ذخيرة وقنبلة وقرنوف
وحالة خوف
من الشهدا
وعيال طالعين بدون توقيت
فقط وحدة هدف واحد
يعيشوا كما يجب ويكون
يعيشوا ولو
يكون أو……
أو……
خيار واحد
تسقط تلكم النجمات
ويسقط من علاهو هلال
وتسقط لجنة الفرقا
وتسقط بس
تعال حاكموني يا ثوار
أنا الغيَّرت لون النيل
وبعت سلالة التاريخ بدون تكليف ولا تفويض
وأيضاً
قلت في الأقوال بأني رئيسكم الأول
بحكم قبيلتي والتسليح..
صحيح وصحيح
بدون تجريح
سلام يا الكهربا القاطعة
سلام تاني
وألف سلام على الدنيا
وعلى التحرير
وجيش الرب
بدون تحديد
لقيت دبوس على بدلة فريق ساكِّي القصيدة ينوح
وفاتح قلبو للماضي هواجس نوم
وبيت أشباح..
سجن كوبر
كبير قصر الزعيم ملكي
بعيد جداً
وما حافاهو أيِّ بيوت
لا مدني
ولا ديَّاشي لابس بوت
منو القال ليك تعال ساعدنا لو تقدر..
تعال رجِّع حبايبنا
تعال رجِّع حلايبنا
وخلينا النموت ونفوت
عشان تحيا البلد حُرَّة
لا منفصلة
لا مقتتلة
لا حاكمنها الأوباش.